Yevropa futbolidagi muvaffaqiyat haqida gap ketganda, hech bir klub Real Madridning Chempionlar ligasidagi hukmronligiga tenglasha olmaydi. Ispaniya giganti bu mavsum finalda ishtirok etmasa-da, “Qirollik klubi” 1955-yilda bu musobaqa tashkil etilganidan beri Yevropaning eng porloq sahnasiga 18 marta chiqqan. Shu vaqt mobaynida LaLiga vakillari turnirni 15 marta yutishgan — bu ikkinchi o‘rindagi “Milan”dan ikki baravar, “Barselona”dan esa uch baravar ko‘p degani.
Ko‘pchilik Madrid klubi bunga raqiblaridan ko‘proq pul sarflab erishadi, deb o‘ylaydi. Bu 20 yil avval, klubning “Galaktikos” davrida to‘g‘ri bo‘lishi mumkin edi, ammo hozirda “Real” ko‘proq raqobatchilar bilan kurashish uchun transfer bozorida ancha puxta va hisob-kitob bilan ishlamoqda. Shundayki, so‘nggi 10 mavsumda Real Madridning umumiy transfer xarajatlari bo‘yicha sof sarfi atigi 232 million yevroni tashkil etadi — bu butun dunyo bo‘yicha 27-o‘rin, hatto “Nottingem Forest”, “Fulhem” va “Bornmut”dan ham past. Bu asosan klubning futbolchilarni katta narxlarda sotish qobiliyati bilan bog‘liq — Madrid bu davrda 768 million yevro transfer daromadi bilan futbolchi sotuvi bo‘yicha 16-o‘rinda turadi. Ammo bu ehtiyotkorona yondashuvning yanada muhim sababi – “Real” dunyo darajasidagi futbolchilarni deyarli tekin yoki butunlay bepul jalb qila olishidadir.
Real Madrid dunyo yulduzlarini bepul olib kelishda oldinda
Madrid klubining transfer to‘lovlari bo‘yicha deyarli hech nima sarflamay, eng yaxshi futbolchilarni o‘z safiga jalb qila olishi yaqqol ko‘rinadi. Bunga yaqqol misol sifatida bu yozda Trent Aleksander-Arnoldning “Liverpul” bilan shartnomasi tugaganidan so‘ng Madridga ko‘chib o‘tishi kutilmoqda. Bozor qiymati 75 million yevro bo‘lgan Angliya terma jamoasi a’zosi tarixdagi eng qimmatbaho uchinchi bepul transferga aylanadi. Shunda Madrid klubi tarixdagi eng qimmat besh bepul transferning uchtasiga ega bo‘ladi — 2021-yilda “Bavariya”dan bozor qiymati 55 million yevroga tekin o‘tgan David Alaba beshinchi o‘rinda, shuningdek, o‘tgan yili bozor qiymati 180 million yevro bo‘lgan Mbappening “PSJ”dan o‘tishi ham ushbu ro‘yxatga kiradi. 2022-yilda “Chelsi”dan bozor qiymati 40 million yevro bo‘lgan Antonio Rüdigerning bepul transferi esa 14-o‘rinni egallaydi.
Oxirgi 10 yillik transfer faoliyatiga nazar tashlaganimizda, “Real” mashhur futbolchilarni shartnomasi tugagach yoki yakunlanish arafasida klubga jalb etganiga bir nechta misollar keltirish mumkin. Masalan, 2014-yil yozida Toni Kroos “Bavariya” bilan shartnoma uzaytirishdan bosh tortdi va Germaniya klubi uni atigi 25 million yevroga sotishga majbur bo‘ldi. To‘rt yil o‘tib, “Real” “Chelsi”dan shartnomasi tugashidan bir yil avval darvozabon Tibo Kurtuani atigi 35 million yevroga olib keldi. Bu yetmagandek, 2019-yilda “Real” FC Tokyo klubidan Takefusa Kuboni tekin, 2021-yilda esa “Renn”dan Eduardo Kamavingani shartnomasining tugashiga bir yil qolganda 31 million yevroga qo‘lga kiritdi.
Agar ushbu futbolchilarning transferlarini bir joyga jamlasak, Madrid bu yetti futbolchini atigi 91 million yevroga sotib olgan. Va bu futbolchilarning aksariyati klubning asosiy tarkib a’zolariga aylanishdi, ichki chempionatlarda ham, Chempionlar ligasida ham klubga bir necha bor g‘alaba keltirishdi. Ularning klub safidagi eng yuqori bozor qiymatlarini jamlasak, bu 550 million yevroni tashkil etadi. Bu shuni anglatadiki, Madrid ularni qancha xarajat evaziga sotib olgan va ular klub uchun qancha qiymatga ega bo‘lganlari orasidagi farq 459 million yevroga teng. Trent Aleksander-Arnold rasmiy ravishda shartnomaga imzo chekkanida bu raqam yarim milliard yevrodan oshib ketishi aniq.
