Juma kuni “Real Madrid” Trent Aleksander-Arnoldni olti yillik shartnoma asosida FIFA Klublar o‘rtasidagi Jahon chempionati oldidan jamoaga qo‘shilganini rasman e’lon qildi. Angliyalik himoyachining iyul oyida transfer oynasi ochilishi bilan La Liga gigantlariga erkin agent sifatida qo‘shilishi kutilayotgan edi, biroq “Real” xalqaro musobaqadan oldin uni erta ro‘yxatdan o‘tkazish uchun ramziy miqdorda to‘lov amalga oshirdi. The Athletic xabariga ko‘ra, himoyachi “Liverpul”ni rejalashtirilganidan oldin tark etgan va buning uchun taxminan €10 million to‘langan.
26 yoshli futbolchining transfer narxi nisbatan past bo‘lishiga qaramay, Aleksander-Arnold “Real”ga €75 million bozor bahosi bilan qo‘shilmoqda — bu esa uni klub tarixidagi to‘rtinchi eng qimmat qiymatga ega futbolchiga aylantiradi. Faqatgina Jud Bellingem (€120 million), Eden Azar (€150 million) va Kilian Mbappe (€180 million) “Real”ga undan yuqori bozor bahosi bilan qo‘shilgan. Trent bu borada Garet Beyl va Tibo Kurtuani (€65 million) ortda qoldirdi.
Liverpulda tug‘ilib o‘sgan Aleksander-Arnold “Liverpul” akademiyasida tarbiya topgan va 18 yoshida asosiy tarkibga kirgan. U “Enfild” safida 350 dan ortiq o‘yin o‘tkazgan. Shu vaqt mobaynida Aleksander-Arnold ikki marta Angliya Premyer-ligasi, bir marta Angliya Kubogi, ikki marta Liga Kubogi va eng asosiysi, 2019 yilda Chempionlar Ligasi g‘olibligini qo‘lga kiritgan. Bu oy boshida klubni tark etishini e’lon qilganida, u “Liverpul”ga bo‘lgan muhabbatini ta’kidlab, “bu hayotimdagi eng og‘ir qaror” bo‘lganini aytdi.
“Bu klub 20 yil davomida mening butun hayotim, butun olamim bo‘lib keldi. Akademiyadan boshlab hozirgacha klub ichida ham, tashqarisida ham ko‘rganim mehr va qo‘llab-quvvatlash umrbod esda qoladi. Men sizlarning oldingizda doim qarzdorman,” — deb yozdi u Instagram sahifasida. “Ammo men hech qachon boshqa hayotni ko‘rmaganman va bu qaror yangi sinov, o‘z hududimdan chiqish, professional va shaxsiy rivoj yo‘lida tashlangan qadam. Bu klubda bo‘lgan har bir kunimda borimni berdim va umid qilamanki, men ham sizga nimadir bera oldim.”
