Pol Pogba ikki yillik tanaffusdan so‘ng futbolga qaytmoqda — u 2025/26 mavsumdan boshlab Fransiyaning “Monako” klubi safida to‘p suradi. Klub shanba kuni bu transferni rasmiylashtirdi. Pogba so‘nggi marta 2023 yil sentabr oyida “Yuventus” safida “Empoli”ga qarshi maydonga tushgan edi. Biroq avgustda doping testidan o‘tolmagani bois, 2024 yil fevralda unga 4 yillik diskvalifikatsiya e’lon qilingan. Keyinchalik Sport arbitraj sudi bu jazo muddatini 18 oygacha qisqartirdi — Pogbaga 2025 yil mart oyida mashg‘ulotlarga qaytishga ruxsat berildi.
“Yuventus” va Pogba o‘tgan yil noyabrda o‘zaro kelishuv asosida shartnomani bekor qilgan. O‘shandan beri Pogba yangi klub qidirayotgan edi. Dastlab u AQSh yoki Saudiya Arabistoniga yo‘l olishi mumkinligi aytilgan, ammo yakunda u “Monako” bilan 2 yillik shartnoma imzoladi.
Pol Pogba: U o‘z formasini qaytara oladimi?
Qariyb ikki yillik tanaffusdan so‘ng Pogbaning qachon to‘liq o‘yin formasiga kirishini aniqlash qiyin. Eng yaxshi davrida u dunyoning yetakchi yarim himoyachilaridan biri edi, ammo “Yuventus”ga qaytgach, doimiy jarohatlar uni sekinlashtirdi. Raqamlar ham bunga dalil: Pogba “Yuventus”da qaytgach, 1 yil ichida atigi 12 o‘yinda qatnashdi, 57 o‘yinni jarohat sabab o‘tkazib yubordi.
Shunga qaramay, “Monako”ga o‘tishi Pogba uchun yangi sahifa bo‘lishi mumkin. Klub o‘tgan mavsumda Liga 1da 3-o‘rinni egallagan va Chempionlar Ligasi yo‘llanmasini qo‘lga kiritgan — bu Pogbaga yuqori darajadagi o‘yin amaliyoti beradi. Qizig‘i shundaki, bu uning Frantsiya oliy ligasidagi ilk tajribasi bo‘ladi.
Transfermarkt’dagi Liga 1 mutaxassisi Joachim Duran bu borada shunday deydi:
“Fransiyada Pogbaning ‘Monako’ga o‘tishi katta qiziqish uyg‘otdi. Hamma hayajonda yoki hech bo‘lmasa qiziqmoqda. Men shaxsan biroz shubhalanaman. Ishonmoqchiman, ammo 32 yoshda, bunday uzoq tanaffusdan so‘ng… bu qiyin. Ammo u yangi o‘yinchi sifatida mashg‘ulot bazasiga kelayotgandekman’ degani meni ijobiy ruhlantirdi.”
Pogba Fransiya terma jamoasiga qayta oladimi?
Hozirda bu haqiqatdan yiroq tuyulsa-da, Pogba uchun asosiy maqsad — 2026 yilgi Jahon Chempionatida Frantsiya terma jamoasiga qaytish. Duran bu borada umid borligini ta’kidlaydi:
“Frantsiya terma jamoasiga qaytish bo‘yicha Pogbaning qo‘lida hamma karta bor. Nazariy jihatdan Desham unga juda katta hurmat bilan qaraydi. U Pogbadek futbolchilar kamdan-kam uchrashishini biladi. Amalda esa, Desham o‘z ‘askarlari’dan voz kechmaydi — bunga Kantening Yevro-2024 uchun qaytishi misol bo‘la oladi. Chempionlar Ligasi ham Desham uchun muhim — u bu musobaqani xalqaro darajaga eng yaqin deb biladi. Agar Pogba yaxshi o‘ynasa — u terma jamoaga qaytadi.”
Xulosa
Pol Pogba “Monako”da yangi hayot boshlamoqda. Jarohatlar, doping sanksiyasi va ikki yil futbolsiz qolgan davrdan so‘ng, u o‘z martabasini qayta tiklamoqchi. Chempionlar Ligasida o‘ynashi va motivatsiyasi uni avvalgi darajasiga qaytarishga xizmat qilishi mumkin. Agar barchasi reja bo‘yicha ketsa, biz uni yana Frantsiya termasida ko‘rishimiz mumkin — ehtimol, so‘nggi marta.
