Uchrashuv yakunida Antoni stadionga ko‘z yugurtirdi, jamoadoshlari bilan quchoqlashdi va yerga cho‘kib, ko‘z yosh to‘kdi. Ammo bu safar “Manchester Yunayted”dagi so‘nggi mavsumlarda bo‘lganidek, navbatdagi mag‘lubiyat yoki kubokdan chiqib ketish emas, balki yashil-oq bayram edi. Real Betis tarixida ilk bor Yevropa finaliga chiqqan edi va endi hazil mavzusi emas, Antoni aynan shu onning qahramoni edi.
Darhaqiqat, braziliyalik vinger o‘zining qadrini o‘yinning 30-daqiqasida ko‘rsatdi. Betis raqib darvozasidan 35 yard uzoqlikda jarima zarbasini qo‘lga kiritgan edi. Chap oyog‘i bilan kuchli zarba bergan Antoni to‘pni devordan aylantirib, uzoq ustunga tegizib, darvozaning ichiga yo‘lladi. Italiyalik mezbonlar javob qaytarib, kechada ikki gol urgan bo‘lsa-da, Antonining yagona goli Betisni finalga olib chiqish uchun yetarli bo‘ldi. Ular endi Konferensiyalar Ligasi finalida “Chelsi”ga qarshi o‘ynaydi.
Antoni: “Man United” va “Real Betis”dagi o‘yin solishtirilmoqda
Ingliz futbol muxlislari Antonining bunday o‘yin ko‘rsatishidan hayratda bo‘lishlari mumkin, ammo Betis muxlislari uchun bu hech qanday yangilik emasdi. Yanvar oyidagi ijara asosida Ispaniyaga kelganidan beri u go‘yoki qaytadan tug‘ilgandek bo‘lib, “Ayaks”dagi yorqin davrini eslatmoqda.
Ko‘p jihatdan, La Ligadagi bu ta’sir aynan “Manchester Yunayted” uni nega bunchalik katta pulga sotib olganini ko‘rsatib beradi. Braziliyalik futbolchi Seviliyada o‘zini ajoyib his qilmoqda va hujumdagi samaradorligi “Yunayted”dagisidan butunlay farq qiladi. Betis safida u har 90 daqiqada o‘rtacha 0.65 gol ishtirokida qatnashmoqda, bu ko‘rsatkich “Yunayted”da atigi 0.22 edi.
Yashil va oq rangda urgan 8 goli — bu joriy mavsumning birinchi yarmi va o‘tgan mavsum davomida “Yunayted”da urgan gollaridan ham ko‘p. Old Trafforddagi ilk mavsumida istiqbolli ko‘ringan bo‘lsa-da, 2022/23-yilgi mavsumda u faqat 5 gol ishtirokida qatnasha oldi. Premyer-liganing tezligi va intensivligida qiynalgan Antoni, avvalgi “Ayaks”dagi faoliyati kabi, texnikaga asoslangan La Ligaga mosroq futbolchidir. “Ayaks”da u ikki mavsumda 44 gol ishtirokida qatnashgan edi.
Antonining Betisdagi aqlbovar qilmas ta’siri
“Antoni endi Betisning yangi afsonasiga aylangan. Muxlislar uning qolishini xohlashmoqda. O‘yindan so‘ng ular ‘Antonio, quedate’ (Antonio, qol) deya qichqirishdi. Unga ispancha laqab berishgan — Antonio. U ko‘z yosh to‘kdi,” dedi Transfermarkt’ning ispan futboli eksperti Ivan Fuente, Angliyadagi futbolchining Ispaniyadagi taassurotlari haqida so‘ralganda.
“Uning o‘yini Betis tarixida ilk bor Yevropa finaliga chiqishida muhim rol o‘ynadi. Agar ular Chelsini mag‘lub etsa, bu unga klub tarixida abadiy joy olib keladi. Real Betis prezidenti bir yilga yana ijarani davom ettirishni so‘rashlarini aytdi.”
U yana shunday dedi: “Ispaniyada soliqlarni to‘laganimizda, ularni qayerga yo‘naltirishni tanlashimiz mumkin – masalan, xayriya tashkilotlariga. Betis muxlislari hazil tariqasida, soliq pullarini Antonyni sotib olishga sarflash uchun kampaniya boshlashdi.”
Real Betis Antonining maoshining 83 foizini to‘lamoqda va shartnomada sotib olish bandi mavjud emas. “Yunayted” esa Antonining bu o‘yinlari yozgi transfer oynasida uning narxini oshirishiga umid qilmoqda – hozir Transfermarkt’dagi bahosi €20 million. Klub u uchun 3 yil oldin to‘lagan katta summani to‘liq qoplay olmasligi mumkin, lekin Antonining Betisdagi o‘yini uning Yevropaning kuchli beshlik ligalarida raqobatlasha olishini ko‘rsatmoqda.
Ehtimol, bu shunchaki uning o‘yin uslubi ispan futboliga ko‘proq mos tushishidadir. Grafikda ko‘rishimiz mumkinki, u joriy mavsumda barcha musobaqalarda jami 14 gol ishtirokida qatnashgan – bu “Yunayted”dagi eng yaxshi ko‘rsatkichidan atigi bittaga kam. U “Ayaks”dagi so‘nggi mavsumida urgan 22 gol+assistdan oshib ketmasligi mumkin, lekin Konferensiyalar Ligasi finalida kiritiladigan bir nechta gollar va assistlar ham unga, ham yangi klubi uchun nihoyatda muhim bo‘lishi mumkin.
