Zamonaviy futbol tarixida Pep Gvardiola va Joze Mourinyo o‘rtasidagi raqobatdek yuqori darajadagi qarama-qarshiliklar kam bo‘lgan. Har ikki murabbiy o‘z avlodining eng yaxshilaridan bo‘lib, ular mutlaqo turlicha o‘yin uslublariga ega, va ular o‘rtasidagi munosabatlarda chinakam ziddiyatlar bo‘lgandek tuyulgan. 2010-yilda Gvardiolaning “Barselona”si o‘sha davr futbolidagi eng qo‘rqinchli jamoalardan biri edi. U “Kamp Nou”dagi to‘rt yillik faoliyati davomida klub bilan 14 ta sovrin, jumladan 2009 va 2011-yillarda ikki marta Chempionlar Ligasida g‘olib chiqqan. Ammo 2010-yilda Gvardiolaning kuchli jamoasi Mourinyoning qat’iy va bardoshli “Inter”iga yarim finalda mag‘lub bo‘lgan. O‘sha mavsumda Italiya grandi musobaqa g‘olibiga aylangan edi.
Bu hafta yana “Barselona” va “Inter” jamoalari Chempionlar Ligasi yarim finalida to‘qnash keladi. Hansi Flik boshchiligidagi “Barselona” Kataloniyada, chorshanba kuni kechqurun, Simone Indzagi murabbiyligidagi “Inter”ni qabul qiladi. Bu o‘yin 2010-yildagi mashhur qarama-qarshilikdan 15 yil o‘tib bo‘lib o‘tadi. Keling, o‘sha tarixiy kechada “Kamp Nou”da maydonga tushgan ikki jamoaning asosiy tarkiblarini eslab o‘tamiz. Har ikkala tarkib ham afsonaviy futbolchilarga to‘la edi.
2010-yilgi Chempionlar Ligasi yarim finali: “Barselona” va “Inter” asosiy tarkiblari
2010-yil 28-aprel kuni “Barselona” Chempionlar Ligasi yarim final javob o‘yinida “Inter”ga qarshi maydonga tushgan. “San Siro”dagi ilk o‘yinda 3:1 hisobida mag‘lub bo‘lgan kataloniyaliklar o‘yinni ag‘darib yuborishga harakat qilgan. 28-daqiqada “Inter” futbolchisi Tiago Motta maydondan chetlatilgan bo‘lsa-da, “Barselona” faqat bir gol urishga muvaffaq bo‘ldi — uni Jerar Pike kechki daqiqalarda kiritgan. Natijada, Mourinyo jamoasi kuchli himoyaviy o‘yin ko‘rsatib, finalga yo‘l olgan edi.
O‘sha kuni “Barselona” darvozasini afsonaviy posbon Viktor Valdes (bozor bahosi: 18 million yevro) qo‘riqlagan. Markaziy himoyada Jerar Pike (25 mln yevro) va markaziy himoyachi sifatida o‘ynagan Yaya Ture (18 mln yevro) harakat qilgan. Chap qanot himoyasida argentinalik Gabriel Milito (14 mln yevro), o‘ng qanotda esa braziliyalik Dani Alves (30 mln yevro) joy olgan edi.
Afsonaviy texnik yarim himoyachi Andres Inyesta jarohati sababli o‘yinda ishtirok eta olmagan, biroq “Barselona” markazidagi uchlik baribir kuchli tarkibga ega edi. Sergi Buskets (20 million yevro) tayanch nuqtasida o‘ynagan, undan oldinda esa klub afsonasi Xavi (65 mln yevro) va Seydu Keyta (16 mln yevro) harakat qilgan. Chap qanotda Pedro (14 mln yevro), o‘ng qanotda esa ko‘pchilik tomonidan barcha davrlarning eng zo‘ri deb hisoblanadigan Lionel Messi (80 mln yevro) maydonga tushgan. Gvardiola jamoasining hujum chizig‘ida esa Zlatan Ibrahimovich (46 mln yevro) saf tortgan — u o‘tgan yozda aynan “Inter”dan 69,5 million yevroga xarid qilingan edi. O‘sha davr uchun nihoyatda yuqori hisoblangan “Barselona”ning umumiy tarkib bahosi 346 million yevroga teng bo‘lgan.
“Inter” safida darvozani braziliyalik afsona Julio Sezar (25 million yevro) qo‘riqlagan. Markaziy himoyada uning vatandoshi Luchio (16 mln yevro) va argentinalik Valter Samuel (15 mln yevro) harakat qilgan. Aslida, “Inter”ning butun orqa chizig‘i Janubiy Amerikadan bo‘lgan futbolchilardan iborat edi. Klub sardori va afsonasi Xavyer Zanetti (8 mln yevro) chap qanot himoyasida, braziliyalik Maikon (30 mln yevro) esa o‘ng qanotda maydonga tushgan.
Markaziy yarim himoyada yuqorida tilga olingan Tiago Motta (12 mln yevro) va Esteban Kambiasso (29 mln yevro) o‘ynagan. Ularning oldida ijodkor futbolchi Uesli Sneyder (29 mln yevro) joy olgan, chap qanotda Kristian Chivu (18 mln yevro), o‘ngda esa avvalgi “Barselona” futbolchisi Samuel Eto’O (40 mln yevro) to‘p surgan. Hujum chizig‘ini esa argentinalik hujumchi Diego Milito (24 mln yevro) boshqargan — u o‘sha mavsum finalda ikkita gol muallifiga aylangan edi.
O‘sha kechadagi “Inter”ning asosiy tarkibining umumiy bozor bahosi 246 million yevroga teng edi.
