Southampton klubi yosh yulduz Tayer Dibling uchun yozgi transfer oynasi oldidan narxni €120 mln (£100 mln) etib belgilagan. The Telegraph nashriga ko‘ra, «Avliyolar» 2018-yilda Virjil van Deyk uchun olgan €85 mln dan ham yuqori summani talab qilishmoqda. Yosh vingerning bozordagi qiymati joriy mavsumda keskin oshib, hozirda €25 mln ga yetgan.
Yozda katta transfer summasiga boshqa bir yosh hujumchi ham jamoasini o‘zgartirishi mumkin. Gap Ayntraxt Frankfurt forvardi Hugo Ekitike haqida ketmoqda. The Sun nashrining xabariga ko‘ra, fransiyalik iqtidorli hujumchi hozirda Arsenal ning asosiy transfer maqsadiga aylangan. «Kanonirlar» ilgari Nyukasl sababli Aleksandr Isak transferidan voz kechishga majbur bo‘lishgan.
Biroq, Nyukasl o‘z hujumchisini saqlab qolsa ham, yozgi transfer oynasida tarkibni kuchaytirish rejasidan voz kechmoqchi emas. The Times xabariga ko‘ra, Eddi Xau va uning murabbiylar shtabi Liverpul himoyachisi Jarell Kuansax ni jamoaga qo‘shib olishga qattiq harakat qilmoqda. Ular 22 yoshli iste’dodli himoyachi uchun €36 mln taklif qilishmoqchi va bu summa Anfild klubini futbolchi bilan xayrlashishga ko‘ndirishiga umid qilishmoqda.
