Shanba kuni kechqurun Angliya va Germaniya Yevro-2025 U21 chempionatining finalida to‘qnash keladi. Angliya yoshlar jamoasida bir nechta yorqin iste’dodlar bor, ammo raqib Germaniya ham o‘z safida o‘yin taqdirini yolg‘iz o‘zgartira oladigan futbolchilar bilan faxrlana oladi. Ulardan eng ko‘zga ko‘ringani — hujumchi Nik Voltemade bo‘lib turibdi.
Nik Voltemade qanchalik kuchli?
2025 yilda Voltemade Germaniya futbolidagi eng katta kashfiyotlardan biriga aylandi. U yozgi transfer oynasida Verder Bremendan Shuttgartga tekinga o‘tgan edi. O‘sha vaqtda u kam tanilgan futbolchi bo‘lsa-da, oradan ko‘p o‘tmay Yevropaning eng ko‘p qiziqilayotgan hujumchilaridan biriga aylandi — bunga uning statistikasi yaqqol misol bo‘ladi.
Avvaliga Shuttgart murabbiyi Sebastyan Xeness jamoasida o‘z o‘rnini topishga biroz vaqt ketgan bo‘lsa-da, u asosiy tarkibda joy olgach, ortga qaramadi:
2024/25 mavsumida Bundesliga doirasida 28 o‘yinda 12 gol va 2 assist qayd etdi. Umumiy hisobda esa barcha musobaqalarda 17 ta gol va 3 ta assist bilan o‘rtacha har 90 daqiqada 0.72 gol+assist ko‘rsatkichiga erishdi.
Eng yorqin o‘yinlarini Germaniya Kubogi (DFB Pokal)da namoyish etdi — har bir qatnashgan o‘yinda gol urdi va Shuttgartni 1997 yildan beri ilk bor kubok bilan ta’minladi. Finalda Arminiya Bilefeld ustidan 4:2 hisobida g‘alaba qozonilgan o‘yinda ham Voltemade gol muallifi bo‘ldi. U turnir davomida 5 o‘yinda 5 ta gol va 1 assist qayd etdi.
Bu performansdan so‘ng Voltemade Yulian Nagelsmann qo‘l ostidagi Germaniya milliy jamoasiga ham chaqirildi — u Nations League doirasida Portugaliya va Fransiyaga qarshi o‘yinlarda maydonga tushdi.
U21 Yevro-2025 musobaqasidagi performansi
Voltemade Germaniya U21 jamoasida ham porladi. Final oldidan u:
- Sloveniya darvozasiga xet-trik
- Chexiyaga qarshi 1 gol va 2 assist
- Italiyaga qarshi 1 gol va 1 assist
- Fransiyaga qarshi yarim finalda 1 gol
urdi. Agar u finalda Angliyaga qarshi 2 ta gol urishga muvaffaq bo‘lsa, Mark Hatlining 1984 yildan beri saqlanib kelayotgan 8 gollik rekordini takrorlaydi.
Nik Voltemadening transfer narxi qancha?
O‘tgan yil bu paytda Voltemadening bozor narxi 5 million yevro atrofida edi. Hozirda u €30 million ga yetdi — bu uni Shuttgartdagi eng qimmat 3-o‘yinchi va dunyo bo‘yicha eng qimmat 12-germaniyalik futbolchiga aylantirgan.
Uning narxi Bundesligada eng tez oshgan to‘rt futbolchidan biri bo‘ldi.
Ammo bu hali ham klub kutayotgan summadan past. Bild nashriga ko‘ra, Shuttgart Voltemade uchun €60 million narx belgilagan — bu klub tarixidagi rekord bo‘lishi mumkin. Hozircha rekord transfer bu — 2019 yilda Bayern Munich tomonidan Benjamin Pavard uchun to‘langan €35 million.
Qaysi klublar uni sotib olmoqchi?
Voltemadening porlashi Yevropaning eng kuchli klublarining e’tiborini tortdi:
- Liverpul va Arsenal hujumdagi muammolarni hal qilish uchun uni kuzatmoqda
- Chelsi va Real Madrid ham ilgari unga qiziqish bildirgan
- Atletiko Madrid — hatto unga eng ko‘p ma’qul kelgan klub sifatida tilga olingan
Ammo hozirgi holatda Bavariya oldinda turibdi. Sky Germany ma’lumotiga ko‘ra, Voltemade shaxsiy shartnomalar bo‘yicha Bavariya bilan kelishib bo‘lgan. Endi faqat Bavariya va Shuttgart o‘rtasida narx bo‘yicha kelishuv qolgan — bu esa yoz transfer oynasi yakuniga qadar hal bo‘lishi mumkin.
