“Men keyingi bosqichga o‘tishim kerakligini aniq aytdim. Men sovrinlar, katta yutuqlar uchun kurashishni xohlayman. Menda bu uchun salohiyat bor.”
Mateus Kunha “Guardian” bilan intervyusida “Vulverxempton”ni tark etish rejalari borligini bildirganidan so‘ng, Premyer-liganing yirik klublari unga qiziqish bildirmoqda. 25 yoshli braziliyalik futbolchi joriy mavsumda faoliyatidagi eng yaxshi davrni boshidan kechirmoqda — u liga doirasida 26 o‘yinda 17 golga bevosita hissa qo‘shgan.
Yanvar oyida Kunhaga katta qiziqish bo‘lgan, ammo u “Vulverxempton”da qolib, jamoaga quyi ligaga tushib ketmaslikda yordam berishga qaror qilgan edi. Yanvar oyida u klub bilan 2029 yilgacha shartnoma imzoladi, ammo unda €75 millionlik tovon puli bandi bor. Ushbu transfer summasi Yevropadagi ba’zi klublar uchun qiyin bo‘lishi mumkin, ammo Premyer-liga jamoalari uchun bu to‘siq emas. Biz Kunhaning besh ehtimoliy yozgi transfer manzilini ko‘rib chiqdik.
Mateus Kunhaning besh ehtimoliy transfer manzili
Arsenal
“Arsenal” bu mavsumda hujumdagi muammolarini hal qila olmaganligi sababli, bu jamoaga Kunhaning kelishi foydali bo‘lishi mumkin. Ayniqsa, asosiy futbolchilarning jarohat olishi jamoaga qimmatga tushmoqda. Braziliyalik futbolchi shimoliy London klubida turli pozitsiyalarda o‘ynashi mumkin. Bundan tashqari, “Arsenal”ning yangi sport direktori Andrea Berta avval 2021 yilda Kunhani “Atletiko Madrid”ga olib kelgan va ular bu yozda yana birlashishi mumkin.
Liverpul
“Liverpul”da hujumchilar kelajagi mavhumligicha qolmoqda va Kunha jamoa uchun yaxshi transfer imkoniyati bo‘lishi mumkin. “Enfild” rahbariyati so‘nggi yillarda katta mablag‘ sarflashdan tiyilib kelayotgan edi, ammo bu yozda vaziyat o‘zgarishi ehtimoli bor. Muhammad Saloh hali yangi shartnoma imzolamagan, shuningdek, Darvin Nunyes va Luis Dias ham jamoani tark etishi mumkinligi haqida mish-mishlar tarqalgan. Kunha hujum chizig‘ida turli pozitsiyalarda o‘ynashi mumkin, shuningdek, u yanvar oyida “Liverpul” bilan ham bog‘langan edi.
Manchester Yunayted
Kunha Ruben Amorimning 3-4-2-1 sxemasida “10-raqam” pozitsiyasida o‘ynash uchun ideal nomzod bo‘lishi mumkin. U “Atletiko Madrid”da o‘ynagan paytidayoq “Manchester Yunayted”ga o‘tishi mumkinligi haqida gap-so‘zlar bo‘lgan, va bu hozir ham davom etmoqda. Biroq “Yunayted”ning bu yozdagi transfer siyosati ko‘proq jamoada ortiqcha bo‘lib qolgan futbolchilarni sotishiga va Yevropa Ligasi g‘olibi sifatida Chempionlar Ligasi yo‘llanmasini qo‘lga kirita olishiga bog‘liq bo‘ladi.
Chelsi
Todd Boehli rahbarligida “Chelsi”ning transfer siyosati tartibsiz bo‘lib kelmoqda. Klub asosan katta salohiyatga ega yosh futbolchilarni xarid qilishga e’tibor qaratgan bo‘lsa-da, so‘nggi paytlarda Kunha bilan tobora ko‘proq bog‘lanmoqda. “Stemford Brij” jamoasida hujum chizig‘ida ko‘plab futbolchilar bor, biroq ularning ayrimlari kutilgan darajada o‘yin ko‘rsata olmadi. Ayniqsa, chap qanotda bo‘sh joy paydo bo‘lishi mumkin va bu Kunhaning o‘yin uslubiga mos keladi.
Nottingem Forest
Yanvar oyida “Nottingem Forest” Kunhani asosiy transfer nishoni sifatida ko‘rib, unga rasmiy taklif yuborgan, ammo “Vulverxempton” bu taklifni rad etgan edi. “Forest” joriy mavsumda Chempionlar Ligasiga yo‘llanma olish imkoniyatiga ega emas, shuning uchun bu jamoa Kunha uchun unchalik jozibador manzil bo‘lib tuyulmaydi. Klubning rekord transfer summasi o‘tgan yozda Elliot Anderson uchun to‘langan €41,2 millionni tashkil qiladi. Agar ular Kunhani sotib olishni istasalar, bu rekordni yangilashlariga to‘g‘ri keladi. Shunga qaramay, “Forest” jiddiy ambitsiyalarga ega jamoa hisoblanadi.
