Manchester Yunayted Angliyadagi eng yirik stadionni qurish bo‘yicha ulkan rejalarini e’lon qildi. £2 milliardlik loyiha doirasida 100 000 o‘rinli yangi arenani barpo etish ko‘zda tutilgan bo‘lib, u Old Trafford yaqinida joylashadi. Klubning hamkor egasi Ser Jim Ratklif ushbu inshootni “dunyoning eng zo‘r futbol stadioni” deb atashni xohlaydi. Loyiha besh yil ichida yakunlanishi rejalashtirilgan.
Bu qaror Old Traffordni ta’mirlash yoki butunlay yangi stadion qurish borasidagi uzoq o‘rganishlardan so‘ng qabul qilindi. 1910 yildan beri Manchester Yunaytedning uyi bo‘lib kelgan Old Trafford hozirda zamonaviy talab va raqobatga mos kelmayotgani sababli, klub global miqyosda yetakchi bo‘lish uchun yangi stadionga ehtiyoj sezmoqda.
Manchester Yunaytedning yangi stadioni qanday bo‘ladi?
Loyihani mashhur me’morlik firmasi Foster and Partners ishlab chiqmoqda. Stadionning asosiy xususiyatlari quyidagilar:
✅ “Trident” deb nomlangan 3 ta ulkan minora – 200 metr balandlikka ega bo‘lib, 25 mil (40 km) uzoqlikdan ko‘rinadi.
✅ Soyabon shaklidagi zamonaviy dizayn va ulkan jamoat maydoni (Trafalgar maydonidan ikki barobar katta).
✅ Buyuk Britaniyaning 2012 yilgi London Olimpiadasi vaqtida Stratfordni qayta qurish loyihasidan buyon eng yirik rivojlanish rejasi.
Klub hozirda £1 milliard qarzga ega, ammo loyiha moliyalashtirish strategiyasi hali oshkor etilmadi. Shunga qaramay, klub bosh direktori Omar Berrada uni «juda jozibali investitsiya loyihasi» deb atab, mablag‘ jalb qilishda muammo bo‘lmasligiga ishonch bildirdi.
Bu loyiha Old Trafford hududining butunlay qayta tiklanishiga sabab bo‘ladi. Rejaga ko‘ra:
???? 92 000 ta yangi ish o‘rni yaratiladi.
???? 17 000 ta yangi uy-joy quriladi.
???? Har yili 1,8 million qo‘shimcha tashrif buyuruvchi jalb qilinadi.
???? Umumiy iqtisodiy ta’siri £7,3 milliardga baholanmoqda.
Britaniya moliya vaziri Reychel Rivz bu loyihani davlat tomonidan qo‘llab-quvvatlashini allaqachon ma’lum qilgan. Agar reja muvaffaqiyatli amalga oshsa, Manchester Yunayted nafaqat Buyuk Britaniyaning, balki dunyoning eng yirik va zamonaviy stadionlaridan biriga ega bo‘ladi.
