Hatto eng sovuq yurakli futbol muxlislarida ham Klaudio Ranieri iliq xotiralar uyg‘otadi. Do‘stona fe’l-atvori bilan tanilgan italiyalik murabbiy o‘z vatanida ham, Angliyada ham sevib hurmat qilinadi. Uning murabbiylik faoliyati besh o‘n yillikka cho‘zilib, deyarli 40 yil avval “Vigor Lamezia” klubida boshlangan. Shu vaqt davomida u 18 xil klubni boshqargan, shuningdek, Gretsiya terma jamoasida ham murabbiylik qilgan.
73 yoshli Ranierining eng katta yutug‘i, shubhasiz, 2015-yilda “Lester Siti”ni barcha taxminlarga zid ravishda Premyer-liga chempioniga aylantirgani bo‘lib, bu futbol tarixidagi eng katta sensatsiyalardan biri sifatida yodda qolgan. Yoshi ulg‘ayganiga qaramay, u futbolga bo‘lgan muhabbatini yo‘qotmagan va faoliyatini davom ettirmoqda. Xususan, u o‘zining ona shahri klubi – “Roma”ga qaytganidan beri jamoaga sezilarli ta’sir o‘tkazmoqda.
Klaudio Ranierining “Roma”dagi so‘nggi missiyasi
Ranieri 2024-yil noyabr oyida “Olimpiko” stadioniga tartibsizliklar fonida qaytib, yil ichida klubning to‘rtinchi doimiy bosh murabbiyi bo‘ldi. Garchi Joze Mourino jamoani tarixidagi ilk yevrokubok g‘alabasiga olib chiqqan bo‘lsa-da, u 2024-yil yanvar oyida iste’foga chiqarildi va uning o‘rniga klub afsonasi Daniele De Rossi tayinlandi. Biroq De Rossi ham 2024-yil sentabrda ishdan bo‘shatildi, uning o‘rnini egallagan Ivan Yurich esa atigi 53 kun jamoani boshqarib turdi. Shundan so‘ng, tartib o‘rnatish uchun mavsum oxirigacha Ranieriga ishonch bildirildi.
“Roma” direktori va afsonasi Franchesko Totti Ranierini “ishonchli qo‘llar” deb ta’riflagan edi va bu so‘zlar o‘z tasdig‘ini topdi. “Roma” A Seriyada 13-o‘rinda qolib ketgan va yomon natijalar bilan mavsumni yakunlashi kutilayotgan bir paytda Ranieri qaytib kelib, jamoaning holatini yaxshiladi. Endi esa “Roma” 8-o‘ringa ko‘tarilib, Yevropa musobaqalariga yo‘llanma olish imkoniyatini saqlab qolmoqda – hozirda ular yevrokubok o‘rinlaridan bor-yo‘g‘i 6 ochko ortda qolmoqda.
Grafikdan ko‘rinib turibdiki, “Roma” 2025-yilda A Seriyada eng yaxshi natijaga ega. So‘nggi 9 o‘yinda jamg‘arilgan 23 ochko jamoani musobaqadagi boshqa barcha klublardan ustun qo‘ymoqda.
Bu natija chempionlik uchun kurashayotgan “Inter”, “Atalanta” va “Napoli”dan ancha yaxshiroq. Tajribali Ranieri jamoani Yevropa Ligasi nimchorak finaliga olib chiqib, pley-offda “Portu” ustidan ishonchli g‘alaba qozondi. Bu natija “Braga” va “Ayntraxt” ustidan erishilgan muhim g‘alabalarni mustahkamladi.
Payshanba kuni esa “Jallorossi” 1/8 final bosqichida “Atletik Bilbao”ga qarshi o‘yinda so‘nggi daqiqalarda Eldor Shomurodovning goli evaziga 2:1 hisobida g‘alaba qozonib, javob uchrashuvi oldidan ustunlikka ega bo‘ldi.
Klaudio Ranieri: Italiyadan qarash
Ranieri “Roma” mavsumini qanday qilib jonlantirdi? Transfermarkt’ning A Seriya bo‘yicha eksperti Jatin Ditl shunday tushuntiradi:
“Roma” tarkiban yaxshi jamoa bo‘lgan, lekin murabbiylar bilan bog‘liq muammolar mavjud edi. De Rossi, mening fikrimcha, motivatsiya va hissiyotlarni boshqarishda juda yaxshi, shuning uchun jamoa o‘tgan mavsumni yaxshi yakunlagan edi. Ammo u hali ham boshqa jihatlardan rivojlanishi kerak, shu sababli uzoq mavsum davomida uning jamoasi zaiflashdi. Jurich bilan ham yaxshi mos kelmadi, bu esa yomon startga sabab bo‘ldi.
Ranieri esa tajribasi bilan klubdagi taranglikni pasaytirishga muvaffaq bo‘ldi. Tarkib yaxshi, ayniqsa Paulo Dibala va Manu Kone kabi muhim futbolchilar bor. Shuningdek, u Mats Xummels, Leandro Paredes, Janluka Manchini va yaqinda Matias Suleni yaxshi formada o‘ynashiga yordam berdi.
“Roma” mavsum boshida A Seriyaning zaif jamoalariga qarshi o‘yinlar o‘tkazgan bo‘lsa ham, bunday o‘yinlarni yutish muhim. Ilk bosqichda jamoa to‘pni ko‘p nazorat qilgan, lekin nima qilishni bilmagandek tuyulgan edi – xuddi o‘zlariga xavf tug‘dirish uchun pas berishayotgandek. Ranieri esa De Rossiga qaraganda jamoaga ancha vertikal o‘yin uslubini berdi va natijada “Roma” raqiblar uchun haqiqiy xavfga aylandi.”
