Yosh futbolchining asosiy tarkibga kirib borishi va o‘zini ko‘rsatishi har qanday futbol muxlisi uchun eng hayajonli lahzalardan biridir. Agar bu futbolchi klub akademiyasida tarbiyalangan bo‘lsa, bu his yanada kuchayadi. Biroq, yosh iste’dodlarni sotib olish ham katta qiziqish uyg‘otadi. Ko‘plab klublar yosh futbolchilarni rivojlantirishni o‘z biznes modeli sifatida qabul qilgan va ularni katta foyda evaziga sotishni maqsad qilgan.
Skautlar butun dunyo bo‘ylab bo‘lajak yulduzlarni topish maqsadida ish olib boradi. Ligue 1 yosh futbolchilarga imkon berish bo‘yicha eng yaxshi beshta liga orasida yetakchi sifatida e’tirof etiladi va bu statistikalar bilan ham tasdiqlanmoqda. Fransiya oliy divizioni joriy mavsumda U21 futbolchilariga jami 102 910 daqiqa o‘yin vaqti bergan. La Liga ikkinchi (88 216 daqiqa), Premer-liga uchinchi (84 538 daqiqa), A Seriya to‘rtinchi (60 506 daqiqa), Bundesliga esa beshinchi (60 323 daqiqa) o‘rinda joylashgan. Ammo qaysi klublar yosh futbolchilarga eng ko‘p imkoniyat bergan? Transfermarkt ma’lumotlariga qaraymiz.
U21 futbolchilariga eng ko‘p o‘yin vaqti bergan klublar
«Strasbur» 2023/24 mavsumida U21 futbolchilariga eng ko‘p o‘yin vaqtini taqdim etgan va joriy mavsumda ham yetakchilik qilmoqda (17 220 daqiqa). Ligue 1 vakili BlueCo konsorsiumi tomonidan sotib olingan, aynan ushbu guruh «Chelsi» klubiga ham egalik qiladi. Ular yosh futbolchilarni rivojlantirish siyosatini tanlashgan va ayni damda **»Chelsi»**dan to‘rtta futbolchi ijara asosida «Strasbur»da to‘p surmoqda. 20 yoshli Andrey Santos 2 304 daqiqa bilan jamoaning eng ko‘p maydonga tushgan futbolchilaridan biri bo‘lsa, Diego Moreyra 2 131 daqiqa bilan uchinchi o‘rinda.
«Barselona» esa 16 373 daqiqa bilan ikkinchi o‘rinni egallagan. Jamoada Lamin Yamal, Pau Kubarsi, Alejandro Balde va Mark Kasado kabi U21 futbolchilari ushbu mavsumda 2 000 daqiqadan ortiq maydonda harakat qilgan.
«RB Leyptsig» – Bundesliganing top-20 taligiga kirgan ikkita klubdan biri
«RB Leyptsig» Bundesligadan U21 futbolchilariga eng ko‘p vaqt ajratgan top 20 ta klubdan biri bo‘lib, jamoaning eng qimmatbaho yosh iste’dodlari Benjamin Seshko, Xavi Simons va Antonio Nusa hisoblanadi.
«PSJ» esa transfer siyosatini o‘zgartirib, yulduz futbolchilarni sotib olishdan ko‘ra, eng yaxshi yosh futbolchilarni jalb qilishga e’tibor qaratdi. Bu strategiya o‘z samarasini berdi va Parij klubi to‘rtinchi o‘rinni egalladi.
Angliyaning eng yaxshi jamoasi – «Brayton»
Premer-ligada yosh futbolchilarga eng ko‘p vaqt bergan jamoa «Brayton» bo‘lib, ular 9 172 daqiqa bilan 7-o‘rinni egalladi. «Tottenhem» ham top-10 talikka kirgan.
A Seriyada faqat «Yuventus» ro‘yxatda
Italiyaning A Seriyasidan «Yuventus» yagona vakil bo‘lib, ular top 20 talikka kirgan. Jamoaning eng ko‘p maydonga tushgan U21 futbolchisi Kenan Yildiz bo‘lib, u joriy mavsumda 2 742 daqiqa o‘ynadi.
