Antonio Cordero – futbol olamida Antoñito nomi bilan tanilgan – hali keng tanilmagan bo‘lsa-da, yirik Yevropa klublarining diqqat markazida turibdi. 18 yoshli futbolchi LaLiga 2da Malaga jamoasi safida ilk muvaffaqiyatli mavsumini o‘tkazdi, ammo u kelasi mavsum Ispaniya ikkinchi divizionida o‘ynamaydi.
Ispaniyaning Marca nashriga ko‘ra, Antoñitoga Real Madrid va Barcelona qiziqish bildirmoqda, ammo uning transferini qo‘lga kiritish borasida Newcastle United favorit sanalmoqda. Iqtidorli vinger o‘tgan yili Barcelonaga o‘tishi mumkin edi, ammo Newcastle klubining asosiy jamoaga yo‘l ochib berish borasidagi taklifi yaxshiroq bo‘lgani aytilmoqda. Bundan tashqari, Antoñito mavsum oxirida erkin agentga aylanadi, chunki uning Malagadagi shartnomasi tugaydi.
Antoñito kim?
Andalusiyada tug‘ilgan Antoñito yoshligida Real Betis va Sevilla akademiyalarida tahsil olgan, keyinchalik Malaga safiga qo‘shilgan va 2022 yilda o‘zining birinchi professional shartnomasini imzolagan. O‘tgan mavsum u Atletico Malaga (Malaga jamoasining ikkinchi tarkibi) safida porlab, jamoaning yuqori divizionga chiqishida hal qiluvchi bo‘lgan 12 ta gol urgan. Ispaniya U19 terma jamoasi a’zosi bo‘lgan Antoñito joriy mavsum Malaga asosiy jamoasi uchun 30 ta o‘yinda 11 ta golli ishtirok qayd etib, yaxshi natija ko‘rsatdi.
Transfermarktning LaLiga bo‘yicha eksperti Ivan Fuente uning o‘yin uslubi haqida shunday deydi:
«Cordero chap qanot hujumchisi bo‘lsa-da, u o‘ng oyog‘ida kuchliroq o‘ynaydi. U so‘nggi yillarda jismoniy tayyorgarligini sezilarli darajada yaxshiladi va hozirda Malaganing ikkinchi eng yaxshi to‘purari bo‘lib turibdi (5 gol). O‘tgan mavsum Malaga B jamoasini yuqori divizionga olib chiqqan golni aynan u urgan va u allaqachon LaLiga 2da yulduz darajasiga yetgan. U yuqori saviyali ligaga ko‘tarilish uchun to‘liq tayyor.»
Antoñitoni kim transfer qilmoqchi?
Antoñito shartnomasining so‘nggi olti oyiga kirgani sababli boshqa klublar bilan erkin muzokara olib borish huquqiga ega va Ispaniyadan tashqaridagi jamoalar bilan oldindan shartnoma imzolashi mumkin. Xabar berilishicha, Newcastle United uning transferini deyarli hal qilgan. Magpies klubi unga moliyaviy jihatdan ancha foydali shartnoma taklif qilgan va asosiy tarkibda o‘ynash bo‘yicha kafolatlar bergan.
Antoñito qayerga o’tishi mumkin?
Fuente qo‘shimcha qildi:
*»Corderoning shartnomasi yozda tugaydi va u Malagada qolish bo‘yicha takliflarni rad etdi. Uning kelajagi boshqa jamoada davom etishi aniq. U Pina Zahavi boshchiligidagi yirik agentlik vakili bo‘lib, erkin agent sifatida turli takliflarni ko‘rib chiqmoqda.
Mening fikrimcha, u Newcastle Unitedga o’tishga Barcelona yoki Real Madriddan ko‘ra yaqinroq, chunki uning atrofidagilar unga doimiy o‘yin amaliyoti taqdim etadigan klubni tanlashni xohlaydi. Ispaniyaning grand jamoalarida u yetarlicha o‘yin daqiqalariga ega bo‘lolmaydi va o‘z mahoratini to‘liq namoyish eta olmaydi.»*
