Niko Uilyams o‘tgan yilgi yozgi transfer oynasining eng ko‘p muhokama qilingan futbolchilaridan biri bo‘lgan edi, biroq u nihoyat shu yozda “Atletik” klubini tark etishi kutilmoqda. Ispaniya terma jamoasi bilan Euro 2024 g‘olibiga aylanganidan so‘ng Uilyamsga “Arsenal”, “Real Madrid” va “Barselona” kabi yirik klublar qiziqish bildirgan, ammo u bolaligidan to‘p surgan klubda yana bir mavsum qolishni tanlagan edi. U 2024-yilda “Atletik”ning 40 yildagi ilk katta sovrini — Ispaniya Kubogini qo‘lga kiritishda muhim rol o‘ynadi, biroq jamoani Bilbao shahrida bo‘lib o‘tgan Yevropa Ligasi finaligacha yetaklay olmadi.
Yevropa Ligasi finalini o‘z yurtida yutish orzusi Niko Uilyamsni o‘tgan yozda yevropalik gigantlarning takliflarini rad etishga undagan edi. U o‘tgan mavsum 45 o‘yinda 11 ta gol urdi va 7 ta assist berdi. Endi esa yangi chaqiriqlarga tayyorligini bildirgan holda, transfer bozorida katta qiziqish uyg‘otmoqda. Uilyams 2027-yilgacha “Atletik” bilan shartnomaga ega, ammo unda 58 million yevrolik tovon puli bandi mavjud — bu esa hozirgi transfer bozorida maqbul qiymat sanaladi. Ammo u qayerga yo‘l oladi?
Niko Uilyams: Ispaniya terma jamoasi yulduziga “Barselona” yetakchilik qilmoqda
Ma’lumotlarga ko‘ra, Uilyamsning asosiy istagi — “Barselona”ga o‘tib, La Ligada qolish. 22 yoshli futbolchi “Barselona”ning yosh yulduzi Lamin Yamal bilan yaqin do‘stlikka ega va bu ikki futbolchi keyingi o‘n yillikda kataloniyalik gigantlarning qanotlarida kuchli tandemga aylanishi mumkin. Ispaniya matbuotiga ko‘ra, Uilyams allaqachon “Barselona” bilan shaxsiy shartlarni kelishib olgan, klub prezidenti Joan Laporta esa uning klubga qo‘shilish istagidan hayratda qolgan.
“Bavariya” ham Uilyamsni sotib olishga jiddiy qiziqqan va unga harakat qilishga tayyor edi, biroq futbolchining Ispaniyada qolishni afzal ko‘rgani ma’lum bo‘lgach, ular boshqa maqsadlarga e’tibor qaratgan. “Arsenal” uzoq muddatdan beri Uilyamsga qiziqib keladi, “Real Madrid” esa uning holatini kuzatib borgan edi. Biroq hozircha Uilyams yozda “Barselona”ga o‘tishga eng yaqin futbolchi bo‘lib turibdi.
Biroq bu transfer oldidagi eng katta to‘siq — “Barselona” hozirda uning maoshini to‘lay oladimi yoki yo‘q. So‘nggi mavsumlarda klubning moliyaviy muammolari ochiq-oydin bo‘lib, ular Ko‘p holatlarda Yevropa futbolidagi Moliyaviy FPP (Fair Play) qoidalari tufayli yangi futbolchilarni ro‘yxatdan o‘tkaza olmayapti — xuddi o‘tgan mavsumda Dani Olmo misolida bo‘lgani kabi. Uilyamsni ro‘yxatdan o‘tkazishdan oldin “Barselona” kamida bir nafar yuqori maosh oluvchi futbolchidan voz kechishga majbur bo‘ladi. Shunga qaramay, Uilyamsning Yamal va jamoasiga qo‘shilishga bo‘lgan istagi aniq.
